ವಯನಾಡ್: ಕೇರಳ ರಾಜ್ಯಾದ್ಯಂತ ಓಣಂ ಬಂಪರ್ ಲಾಟರಿಯ ವಿಜೇತರ ಕುರಿತು ಚರ್ಚೆಗಳು ಜೋರಾಗಿ ನಡೆಯುತ್ತಿರುವ ಬೆನ್ನಲ್ಲೇ, ವಯನಾಡಿನ ಚೀರಾಲ್ ಬಳಿಯ ಗಡಿ ಪಟ್ಟಣವಾದ ನಂಬಿಯಾರ್ಕುನ್ನುವಿನಲ್ಲಿ ಘೋರ ಕೃತ್ಯವೊಂದು ನಡೆದಿದೆ. ವರ್ಷಗಳಿಂದ ಟಿಕೆಟ್ ಖರೀದಿಸುತ್ತಿದ್ದರೂ ತನಗೆ ಯಾವುದೇ ಬಹುಮಾನ ಬರಲಿಲ್ಲ ಎಂಬ ಕ್ಷುಲ್ಲಕ ಕಾರಣಕ್ಕೆ ಕುಡುಕ ದಿನಗೂಲಿ ಕಾರ್ಮಿಕನೊಬ್ಬ ಮಹಿಳಾ ಲಾಟರಿ ಮಾರಾಟಗಾರ್ತಿಯ ಕುತ್ತಿಗೆ ಮತ್ತು ತಲೆಗೆ ಚಾಕುವಿನಿಂದ ಭೀಕರವಾಗಿ ಇರಿದಿದ್ದಾನೆ.
ತಮಿಳುನಾಡಿನ ಪಟ್ಟವಯಲ್ ಬಳಿಯ ಪಂಚೋರಾ ನಿವಾಸಿ ಶಿವಕುಮಾರ್ ಬಂಧಿತ ಆರೋಪಿ. ಭಾನುವಾರ ಮಧ್ಯಾಹ್ನದ ಸುಮಾರಿಗೆ ನಂಬಿಯಾರ್ಕುನ್ನುವಿನ ಕೇರಳ ಭಾಗದಲ್ಲಿರುವ ‘ಪೂಂಕವನಂ ಲಾಟರಿ ಅಂಗಡಿ’ಯ ಬಳಿ ಈ ಕೃತ್ಯ ನಡೆದಿದೆ. ಮದ್ಯದ ಅಮಲಿನಲ್ಲಿದ್ದ ಆರೋಪಿ ಶಿವಕುಮಾರ್, ಲಾಟರಿ ಮಾರಾಟಗಾರ್ತಿ ವಿನೀತಾ ಎಂಬವರೊಂದಿಗೆ ಜಗಳ ತೆಗೆದಿದ್ದಾನೆ. “ಹಲವು ವರ್ಷಗಳಿಂದ ನಿನ್ನ ಬಳಿ ನಿಯಮಿತವಾಗಿ ಲಾಟರಿ ಟಿಕೆಟ್ ಕೊಳ್ಳುತ್ತಿದ್ದರೂ ನನಗೆ ಒಮ್ಮೆಯೂ ಅದೃಷ್ಟ ಒಲಿಯಲಿಲ್ಲ” ಎಂದು ನಿಂದಿಸಿ, ಏಕಾಏಕಿ ಚಾಕುವಿನಿಂದ ವಿನೀತಾ ಅವರ ಕುತ್ತಿಗೆ ಮತ್ತು ತಲೆಯ ಭಾಗಕ್ಕೆ ಇರಿದಿದ್ದಾನೆ.
ಈ ವೇಳೆ ಆರೋಪಿ ತೀರಾ ಆಕ್ರಮಣಕಾರಿಯಾಗಿ ವರ್ತಿಸಿದ್ದರಿಂದ, ಹತ್ತಿರದ ಚೆಕ್ಪೋಸ್ಟ್ನಲ್ಲಿ ಕರ್ತವ್ಯದಲ್ಲಿದ್ದ ತಮಿಳುನಾಡು ಪೊಲೀಸ್ ಸಿಬ್ಬಂದಿ ಹಾಗೂ ಸ್ಥಳೀಯ ಸಾರ್ವಜನಿಕರು ಸೇರಿ ಆತನನ್ನು ಸಾಹಸಪಟ್ಟು ಕಟ್ಟಿಹಾಕಿದ್ದಾರೆ. ಬಳಿಕ ಸ್ಥಳಕ್ಕೆ ಆಗಮಿಸಿದ ಕೇರಳದ ನೂಲ್ಪುಳ ಪೊಲೀಸರು ಆರೋಪಿಯನ್ನು ವಶಕ್ಕೆ ಪಡೆದು ಬಂಧಿಸಿದ್ದಾರೆ. ದಾಳಿಯಿಂದ ರಕ್ತಸ್ರಾವದಿಂದ ಬಳಲುತ್ತಿದ್ದ ವಿನೀತಾ ಅವರನ್ನು ತಕ್ಷಣವೇ ಸುಲ್ತಾನ್ ಬತ್ತೇರಿಯ ತಾಲೂಕು ಆಸ್ಪತ್ರೆಗೆ ಸಾಗಿಸಲಾಯಿತು. ವಿನೀತಾ ಅವರ ಗಾಯಗಳು ತೀವ್ರ ಸ್ವರೂಪದ್ದಾಗಿದ್ದರೂ, ಅದೃಷ್ಟವಶಾತ್ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ ಎಂದು ವೈದ್ಯರು ಸ್ಪಷ್ಟಪಡಿಸಿದ್ದಾರೆ.
ಘಟನೆಗೆ ಸಂಬಂಧಿಸಿದಂತೆ ನೂಲ್ಪುಳ ಪೊಲೀಸ್ ಠಾಣೆಯಲ್ಲಿ ಶಿವಕುಮಾರ್ ವಿರುದ್ಧ ಕೊಲೆಯತ್ನ ಸೇರಿದಂತೆ ವಿವಿಧ ಗಂಭೀರ ಪ್ರಕರಣಗಳನ್ನು ದಾಖಲಿಸಿಕೊಂಡು ಪೊಲೀಸರು ಮುಂದಿನ ತನಿಖೆ ಕೈಗೊಂಡಿದ್ದಾರೆ.
