ಕೇರಳ: ಕುಡಿದ ಮತ್ತಿನಲ್ಲಿ ಪತ್ನಿಯೊಂದಿಗೆ ಜಗಳವಾಡುತ್ತಿದ್ದ ವಲಸೆ ಕಾರ್ಮಿಕನೊಬ್ಬ, ತಾಯಿಯ ಮಡಿಲಲ್ಲಿದ್ದ ಎರಡು ವರ್ಷದ ಮಗಳನ್ನು ಕಿತ್ತು ನೆಲಕ್ಕೆ ಎಸೆದು ಬರ್ಬರವಾಗಿ ಕೊಲೆ ಮಾಡಿರುವ ಘಟನೆ ಕೇರಳದ ಆಲಪ್ಪುಳ ಜಿಲ್ಲೆಯ ಮಾವೆಲಿಕ್ಕರ ಸಮೀಪದ ವೆಟ್ಟಿಯಾರ್ನಲ್ಲಿ ನಡೆದಿದೆ. ಅಸ್ಸಾಂನ ಬಾರಾಮತಿ ಮೂಲದ ಪರಿತೋಷ್ ಮಂಡಲ್ (27) ಬಂಧಿತ ಆರೋಪಿ. ಈತನ ಕೃತ್ಯಕ್ಕೆ ಬಲಿಯಾದ ದುರ್ದೈವಿ ಮಗುವನ್ನು ದೀಪಿಕಾ (2) ಎಂದು ಗುರುತಿಸಲಾಗಿದೆ.
ಕಟ್ಟಡ ನಿರ್ಮಾಣ ಮತ್ತು ಮೇಸ್ತ್ರಿ ಕೆಲಸ ಮಾಡಿಕೊಂಡಿದ್ದ ಪರಿತೋಷ್ ಮಂಡಲ್, ಪತ್ನಿ ರೊಂಡೋವಲ್ಲಿ ಮತ್ತು ಮಗಳೊಂದಿಗೆ ಮಂಗಮ್ಕುಳಿ ಜಂಕ್ಷನ್ನ ಪೂರ್ವ ಭಾಗದಲ್ಲಿರುವ ವೆಟ್ಟಿಯಾರ್ನಲ್ಲಿ ಬಾಡಿಗೆ ಮನೆಯಲ್ಲಿ ವಾಸವಿದ್ದ. ಮದ್ಯ ಸೇವಿಸಿ ಮನೆಗೆ ಬಂದಿದ್ದ ಪರಿತೋಷ್, ಪತ್ನಿ ರೊಂಡೋವಲ್ಲಿಯೊಂದಿಗೆ ತೀವ್ರ ವಾಗ್ವಾದ ನಡೆಸಿದ್ದಾನೆ. ಜಗಳ ವಿಕೋಪಕ್ಕೆ ತಿರುಗಿದಾಗ, ಪತ್ನಿಯ ಮಡಿಲಲ್ಲಿ ಕುಳಿತಿದ್ದ ಮಗು ದೀಪಿಕಾಳನ್ನು ಬಲವಂತವಾಗಿ ಕಿತ್ತುಕೊಂಡ ಆರೋಪಿ, ಕೋಪದ ಭರದಲ್ಲಿ ನೆಲಕ್ಕೆ ಎಸೆದಿದ್ದಾನೆ. ಇದರಿಂದ ಮಗುವಿಗೆ ತೀವ್ರ ಸ್ವರೂಪದ ಗಾಯಗಳಾಗಿವೆ.
ತಕ್ಷಣವೇ ಮಗುವನ್ನು ಮಾವೆಲಿಕ್ಕರ ಜಿಲ್ಲಾ ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ, ಅದಾಗಲೇ ಮಗು ಮೃತಪಟ್ಟಿರುವುದಾಗಿ ವೈದ್ಯರು ಘೋಷಿಸಿದರು. ಮಗುವಿನ ದೇಹದ ಮೇಲೆ ಹಲ್ಲೆ ಮತ್ತು ಚಿತ್ರಹಿಂಸೆಯ ಗುರುತುಗಳನ್ನು ಗಮನಿಸಿದ ವೈದ್ಯರಿಗೆ ಸಾವಿನ ಬಗ್ಗೆ ಅನುಮಾನ ಮೂಡಿದ್ದು, ತಕ್ಷಣ ಮಾವೆಲಿಕ್ಕರ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಪ್ರಕರಣ ದಾಖಲಿಸಿಕೊಂಡ ಕುರತಿಕಾಡು ಪೊಲೀಸರು ತನಿಖೆ ನಡೆಸಿ ಆರೋಪಿ ಪರಿತೋಷ್ ಮಂಡಲ್ನನ್ನು ಬಂಧಿಸಿದ್ದಾರೆ. ಸದ್ಯ ಮಗುವಿನ ಮೃತದೇಹವನ್ನು ಜಿಲ್ಲಾ ಆಸ್ಪತ್ರೆಯ ಶವಾಗಾರದಲ್ಲಿ ಇರಿಸಲಾಗಿದ್ದು, ಮುಂದಿನ ತನಿಖೆ ಕೈಗೊಳ್ಳಲಾಗಿದೆ.








