ಬೆಂಗಳೂರು: ‘ರಾಕಿಂಗ್ ಸ್ಟಾರ್’ ಯಶ್ ನಾಲ್ಕು ವರ್ಷಗಳ ಬಳಿಕ ಮತ್ತೆ ತೆರೆ ಮೇಲೆ ಕಾಣಿಸಿಕೊಂಡಿದ್ದಾರೆ. ಬ್ಲಾಕ್ಬಸ್ಟರ್ ‘KGF’ ಸರಣಿಯ ಬಳಿಕ ಬಿಡುಗಡೆಯಾದ ಅವರ ಮೊದಲ ಸಿನಿಮಾ ‘ಟಾಕ್ಸಿಕ್’. ಈ ಚಿತ್ರದಲ್ಲಿ ಯಶ್ ಮತ್ತೊಮ್ಮೆ ಗ್ಯಾಂಗ್ಸ್ಟರ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.
ಆದರೆ ಭಾರೀ ನಿರೀಕ್ಷೆಯೊಂದಿಗೆ ತೆರೆಕಂಡಿರುವ ‘ಟಾಕ್ಸಿಕ್’ಗೆ ಆರಂಭಿಕವಾಗಿ ಸಿಗುತ್ತಿರುವ ಪ್ರತಿಕ್ರಿಯೆ ಇದೀಗ ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. BookMyShowನಲ್ಲಿ ಚಿತ್ರದ ರೇಟಿಂಗ್ 5.6/10ರಷ್ಟಿದ್ದು, ಪ್ರೇಕ್ಷಕರ ಪ್ರತಿಕ್ರಿಯೆ ಮಿಶ್ರವಾಗಿದೆ. ಯಶ್ ಅವರ ಅಭಿನಯ ಮತ್ತು ಸ್ಟೈಲಿಶ್ ಪ್ರೆಸೆನ್ಸ್ಗೆ ಮೆಚ್ಚುಗೆ ವ್ಯಕ್ತವಾಗುತ್ತಿದ್ದರೂ, ಕಥೆ, ಸ್ಕ್ರೀನ್ಪ್ಲೇ, ಎಡಿಟಿಂಗ್ ಹಾಗೂ ಚಿತ್ರದ ದೈರ್ಘ್ಯದ ಬಗ್ಗೆ ಕೆಲ ಪ್ರೇಕ್ಷಕರು ಹಾಗೂ ವಿಮರ್ಶಕರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಸಿನಿಮಾದ ಕಥೆ ಮತ್ತು ನಿರೂಪಣೆಯ ಬಗ್ಗೆ ಟೀಕೆಗಳು ಕೇಳಿಬರುತ್ತಿರುವುದು ಗಮನ ಸೆಳೆಯುತ್ತಿದೆ. ಕೆಲ ಆರಂಭಿಕ ಪ್ರತಿಕ್ರಿಯೆಗಳಲ್ಲಿ ಸಿನಿಮಾ ‘KGF’ ಪ್ರಭಾವದಿಂದ ಹೊರಬರಲು ಸಾಧ್ಯವಾಗಿಲ್ಲ ಎಂಬ ಅಭಿಪ್ರಾಯವೂ ವ್ಯಕ್ತವಾಗಿದೆ.
ಇದರಿಂದ ಮತ್ತೊಂದು ಪ್ರಶ್ನೆ ಎದುರಾಗುತ್ತಿದೆ — ಯಶ್ ನಟನೆಯ ಜೊತೆಗೆ ನಿರ್ದೇಶನ ಮತ್ತು ಸಿನಿಮಾದ ಇತರ ವಿಭಾಗಗಳಲ್ಲಿ ಹೆಚ್ಚು ಇನ್ವಾಲ್ವ್ ಆಗಿದ್ದರೇ? ಅದರಿಂದ ಕಥೆ ಅಥವಾ ನಿರೂಪಣೆಯಲ್ಲಿ ಏನಾದರೂ ಎಡವಟ್ಟಾಯಿತೇ?ಅಥವಾ ಯಶ್ ಕೇವಲ ನಟನೆಯತ್ತ ಗಮನಹರಿಸಿದ್ದರೆ ಸಿನಿಮಾ ಇನ್ನಷ್ಟು ವಿಭಿನ್ನವಾಗಿ ಮೂಡಿಬರುತ್ತಿತ್ತೇ? ಸಿನಿಮಾದ ಮೇಲಿದ್ದ ಭಾರೀ ಫ್ಯಾನ್ ಹೈಪ್ ಮಾತ್ರವೇ ಆರಂಭಿಕ ನಿರೀಕ್ಷೆಗಳನ್ನು ಹೆಚ್ಚಿಸಿತೇ? ಇಲ್ಲವೇ ಕಥೆ, ಟೆಕ್ನಿಕಲ್ ಟೀಮ್, ಎಡಿಟಿಂಗ್ ಅಥವಾ ನಿರ್ದೇಶನದ ಹಂತದಲ್ಲಿ ಯಶ್ ಇನ್ವಾಲ್ವ್ ಆಗಿದ್ದರಿಂದ ಪ್ರಮುಖ ತಪ್ಪು ನಡೆದಿದೆಯೇ ಎಂಬ ಚರ್ಚೆಯೂ ಆರಂಭವಾಗಿದೆ.
ಇದರ ನಡುವೆ ಮತ್ತೊಂದು ಪ್ರಶ್ನೆಯೂ ಮುನ್ನೆಲೆಗೆ ಬಂದಿದೆ — ಭಾರತ ಚಿತ್ರರಂಗದೊಳಗೆ ಷಡ್ಯಂತ್ರ ನಡೆದಿದೆಯೇ ಅಥವಾ ಉದ್ದೇಶಪೂರ್ವಕವಾಗಿ ನೆಗೆಟಿವ್ ಪ್ರಚಾರ ಮಾಡಲಾಗಿದೆಯೇ? ಈ ಎಲ್ಲಾ ಪ್ರಶ್ನೆಗಳಿಗೆ ‘ಟಾಕ್ಸಿಕ್’ನ ಮುಂದಿನ ದಿನಗಳ ಪ್ರೇಕ್ಷಕರ ಪ್ರತಿಕ್ರಿಯೆಯೇ ಉತ್ತರ ನೀಡಲಿದೆ. IMDb ರೇಟಿಂಗ್ಗಾಗಿ ಎದುರು ನೋಡುತ್ತಿದ್ದ ಅಭಿಮಾನಿಗಳ ನಿರೀಕ್ಷೆಗೂ ಇದೀಗ ಹೊಡೆತ ಬಿದ್ದಿದ್ದು, ಆರಂಭಿಕ ಪ್ರತಿಕ್ರಿಯೆಗಳು ಕುತೂಹಲದ ಜತೆಗೆ ನಿರಾಸೆಯನ್ನೂ ಮೂಡಿಸಿವೆ.
