ಸುದರ್ಶನ್ ಜೈನ್ ಕೊಲೆ ಆರೋಪಿ ಕೋರ್ಟ್‌ನಿಂದಲೇ ಎಸ್ಕೇಪ್; ಪೊಲೀಸರಿಂದ ತೀವ್ರ ಶೋಧ

ಮಂಗಳೂರು: ಮೂಡುಬಿದ್ರೆ ಪೊಲೀಸ್ ಠಾಣೆಯಲ್ಲಿ ದಾಖಲಾಗಿರುವ ಸುದರ್ಶನ್ ಜೈನ್ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದ ಆರೋಪಿಯೊಬ್ಬ ಸೆಪ್ಟೆಂಬರ್ 22ರಂದು ಮಂಗಳೂರು ನ್ಯಾಯಾಲಯದ ಆವರಣದಿಂದ ಪೊಲೀಸರ ಕಣ್ತಪ್ಪಿಸಿ ಪರಾರಿಯಾಗಿದ್ದಾನೆ. ನ್ಯಾಯಾಲಯದ ವಿಚಾರಣೆ ಬಳಿಕ ಪೊಲೀಸ್ ಕಸ್ಟಡಿಗೆ ಒಪ್ಪಿಸಲಾಗಿದ್ದ ಆರೋಪಿಯನ್ನು ಜಿಲ್ಲಾ ಕಾರಾಗೃಹಕ್ಕೆ ಕರೆದೊಯ್ಯುವ ವೇಳೆ ಈ ಘಟನೆ ನಡೆದಿದೆ.

2018ರ ಸುದರ್ಶನ್ ಜೈನ್ ಕೊಲೆ ಪ್ರಕರಣದ ವಿಚಾರಣೆಗೆ ಸಿದ್ದಕಟ್ಟೆ ನಿವಾಸಿ ಪ್ರಸಾದ್ ಸೇರಿದಂತೆ ಐವರು ಆರೋಪಿಗಳು ನ್ಯಾಯಾಲಯಕ್ಕೆ ಹಾಜರಾಗಿದ್ದರು. ಸಂದೀಪ್ ಶೆಟ್ಟಿ, ಬಾಲರಾಜ್ ಮತ್ತು ಪ್ರಭಾಕರ್ ಪರ ವಕೀಲರು ಹಾಜರಾಗಿ ಜಾಮೀನು ಪ್ರಕ್ರಿಯೆ ನಡೆಸಿದ್ದರು. ಆದರೆ ಪ್ರಸಾದ್ ಪರ ಯಾವುದೇ ವಕೀಲರು ಹಾಜರಾಗದಿದ್ದು, ಹಿಂದಿನ ವಿಚಾರಣೆಗೆ ಗೈರಾಗಿದ್ದ ಕಾರಣ ಅವರ ವಿರುದ್ಧ ಈಗಾಗಲೇ ವಾರಂಟ್ ಕೂಡ ಜಾರಿಯಾಗಿತ್ತು.

ಸೆಪ್ಟೆಂಬರ್ 22ರಂದು ವಿಚಾರಣೆಗೆ ಹಾಜರಾದ ಆರೋಪಿಗಳ ಪೈಕಿ ಪ್ರಸಾದ್ ಪರ ವಕೀಲರು ಇರದ ಹಿನ್ನೆಲೆಯಲ್ಲಿ ನ್ಯಾಯಾಧೀಶರು ಅವರನ್ನು ಪೊಲೀಸ್ ಕಸ್ಟಡಿಗೆ ಒಪ್ಪಿಸಿದರು. ಬಳಿಕ ರಿಮಾಂಡ್ ವಾರೆಂಟ್‌ನೊಂದಿಗೆ ಜಿಲ್ಲಾ ಕಾರಾಗೃಹಕ್ಕೆ ಕರೆದೊಯ್ಯುತ್ತಿದ್ದಾಗ, ನ್ಯಾಯಾಲಯದ ಆವರಣದಲ್ಲಿರುವ ಶೌಚಾಲಯಕ್ಕೆ ಹೋಗಿ ಬರುವುದಾಗಿ ಹೇಳಿ ತೆರಳಿದ ಪ್ರಸಾದ್ ಅಲ್ಲಿಂದ ಪೊಲೀಸರ ಗಮನ ತಪ್ಪಿಸಿ ಪರಾರಿಯಾಗಿದ್ದಾನೆ. ಘಟನೆಗೆ ಸಂಬಂಧಿಸಿ ಮೂಡುಬಿದ್ರೆ ಪೊಲೀಸ್ ಸಿಬ್ಬಂದಿ ಅಶೋಕ್ ನೀಡಿದ ದೂರಿನ ಆಧಾರದಲ್ಲಿ ಮಂಗಳೂರು ಬಂದರು ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.

ಸುದರ್ಶನ್ ಜೈನ್ ಕೊಲೆ ಪ್ರಕರಣದ ಹಿನ್ನೆಲೆ

2018ರ ಆಗಸ್ಟ್ 11ರಂದು ಮೂಡುಬಿದ್ರೆಯಲ್ಲಿ ಬಟ್ಟೆ ವ್ಯಾಪಾರ ಮಾಡುತ್ತಿದ್ದ ಹೊಸಬೆಟ್ಟು ನಿವಾಸಿ ಸುದರ್ಶನ್ ಜೈನ್ ಕಾಣೆಯಾಗಿದ್ದರು. ಸುಮಾರು ಒಂದು ವಾರದ ಬಳಿಕ ಫಲ್ಗುಣಿ ನದಿ ಪ್ರದೇಶದಲ್ಲಿ ಅವರ ಮೃತದೇಹ ಪತ್ತೆಯಾಗಿತ್ತು. ಕುತ್ತಿಗೆ ಬಿಗಿದ ಗುರುತುಗಳಿದ್ದ ಹಿನ್ನೆಲೆಯಲ್ಲಿ ಪೊಲೀಸರು ಕೊಲೆ ಪ್ರಕರಣದ ಶಂಕೆಯಲ್ಲಿ ತನಿಖೆ ಆರಂಭಿಸಿದ್ದರು. ತನಿಖೆಯ ವೇಳೆ ಸುದರ್ಶನ್ ಅವರ ಸಹೋದರ ಸುಧೀರ್ ಜೈನ್, ಸಿದ್ದಕಟ್ಟೆಯ ಸಂದೀಪ್ ಶೆಟ್ಟಿ, ಅರಂಬೋಡಿ ನಿವಾಸಿ ಬಾಲರಾಜ್ ಸೇರಿದಂತೆ ಹಲವರನ್ನು ಬಂಧಿಸಲಾಗಿತ್ತು. ನಂತರ ಪ್ರಸಾದ್‌ಗೂ ಪ್ರಕರಣದಲ್ಲಿ ಪಾತ್ರವಿದೆ ಎಂದು ತಿಳಿದು ಆತನನ್ನೂ ಬಂಧಿಸಲಾಗಿತ್ತು.

ಹಣದಾಸೆಯೇ ಕೊಲೆಗೆ ಕಾರಣ ಎಂಬ ಆರೋಪ

ಸುದರ್ಶನ್ ಮತ್ತು ಸುಧೀರ್ ಅವರ ತಾಯಿ ಹೊಂದಿದ್ದ ಸುಮಾರು 2.7 ಎಕರೆ ಜಮೀನು ಮಾರಾಟವಾಗಿದ್ದು, ಅದರ ಮುಂಗಡವಾಗಿ ₹6 ಲಕ್ಷ ಬಂದಿತ್ತು. ಅದರಲ್ಲಿ ₹3 ಲಕ್ಷವನ್ನು ಸುಧೀರ್ ಪಡೆದಿದ್ದನು. ಉಳಿದ ₹3 ಲಕ್ಷವೂ ತನಗೆ ನೀಡಬೇಕು ಎಂದು ಸುಧೀರ್ ಸುದರ್ಶನ್ ಮೇಲೆ ಒತ್ತಡ ಹೇರಿದ್ದ ಎನ್ನಲಾಗಿದೆ. ಹಣ ನೀಡಲು ಸುದರ್ಶನ್ ನಿರಾಕರಿಸಿದ ಹಿನ್ನೆಲೆಯಲ್ಲಿ ಕೊಲೆ ಸಂಚು ರೂಪಿಸಲಾಗಿದೆ ಎಂದು ತನಿಖೆಯಲ್ಲಿ ಆರೋಪಿಸಲಾಗಿತ್ತು. ಬಳಿಕ 2018ರ ಆಗಸ್ಟ್ 11ರಂದು ಸುಧೀರ್ ತನ್ನ ಬೈಕಿನಲ್ಲಿ ಸುದರ್ಶನ್‌ರನ್ನು ಹೊಸಬೆಟ್ಟಿಗೆ ಕರೆದುಕೊಂಡು ಬಂದಿದ್ದ ಎನ್ನಲಾಗಿದೆ.

ನಂತರ ಕಾರಿನಲ್ಲಿ ಕಾದಿದ್ದ ಇತರ ಆರೋಪಿಗಳು ಸುದರ್ಶನ್‌ರನ್ನು ಬಲವಂತವಾಗಿ ಕಾರಿನೊಳಗೆ ಕರೆದೊಯ್ದು ಉಸಿರುಗಟ್ಟಿಸಿ ಕೊಲೆ ಮಾಡಿದರು ಎಂದು ಪ್ರಕರಣದ ತನಿಖೆಯಲ್ಲಿ ತಿಳಿದುಬಂದಿತ್ತು. ಬಳಿಕ ಮೃತದೇಹವನ್ನು ನಿರ್ಜನ ಪ್ರದೇಶಕ್ಕೆ ಕೊಂಡೊಯ್ದು ಫಲ್ಗುಣಿ ನದಿಗೆ ಎಸೆದಿರುವ ಆರೋಪ ಕೇಳಿಬಂದಿತ್ತು. ಈ ಕೃತ್ಯದಲ್ಲಿ ಪ್ರಸಾದ್ ಕಾರು ಚಾಲನೆ ಮಾಡುವ ಮೂಲಕ ಸಹಕರಿಸಿದ್ದಾನೆ ಎಂಬ ಆರೋಪವೂ ಪ್ರಕರಣದಲ್ಲಿದೆ.