ನವದೆಹಲಿ: ಅಫ್ಘಾನಿಸ್ತಾನದಲ್ಲಿ ಒಂಟಿಯಾಗಿ ಪ್ರಯಾಣಿಸುತ್ತಿದ್ದಾಗ ತಾಲಿಬಾನ್ ಆಡಳಿತದಿಂದ ಬಂಧನಕ್ಕೊಳಗಾಗಿದ್ದಾಗಿ ಸೋಶಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಿ ಆತಂಕ ಸೃಷ್ಟಿಸಿದ್ದ ಭಾರತೀಯ ಏಕಾಂಗಿ ಪ್ರಯಾಣಿಕ ಅರುಣಿಮಾ ಐಪಿ ಮಂಗಳವಾರ ತಾನು ಸುರಕ್ಷಿತವಾಗಿರುವುದಾಗಿ ಸ್ಪಷ್ಟಪಡಿಸಿದ್ದಾರೆ. ಕೇರಳದ ಪಾಲಕ್ಕಾಡ್ ಜಿಲ್ಲೆಯ ಒಟ್ಟಪಾಲಂ ಮೂಲದ ಅರುಣಿಮಾ, ಕಳೆದ ಆರು ವರ್ಷಗಳಿಂದ ಜಗತ್ತಿನಾದ್ಯಂತ ಬ್ಯಾಕ್ಪ್ಯಾಕಿಂಗ್ ಹಾಗೂ ಹಿಚ್ಹೈಕಿಂಗ್ ಮೂಲಕ ಏಕಾಂಗಿ ಪ್ರವಾಸ ಮಾಡುತ್ತಿರುವ ಪ್ರಸಿದ್ಧ ಯೂಟ್ಯೂಬರ್ ಆಗಿದ್ದಾರೆ.
ಕಳೆದ ಆಗಸ್ಟ್ 27 ರಂದು ಅಫ್ಘಾನಿಸ್ತಾನಕ್ಕೆ ತಲುಪಿದ್ದ ಅರುಣಿಮಾ, ಅಲ್ಲಿನ ಕಠಿಣ ಪರಿಸ್ಥಿತಿಯ ನಡುವೆಯೂ ಪ್ರವಾಸ ಮುಂದುವರಿಸಿದ್ದರು. ಸೋಮವಾರ ಯೂಟ್ಯೂಬ್ನಲ್ಲಿ ವೀಡಿಯೊ ಹಂಚಿಕೊಂಡಿದ್ದ ಅವರು, “ಅಫ್ಘಾನಿಸ್ತಾನದ ಕಾನೂನಿನ ಪ್ರಕಾರ ಮಹಿಳೆಯರು ಒಂಟಿಯಾಗಿ ಪ್ರಯಾಣಿಸಲು ಅವಕಾಶವಿಲ್ಲ. ಹೀಗಾಗಿ ತಾಲಿಬಾನ್ ನನ್ನನ್ನು ಬಂಧಿಸಿದೆ. ದಯವಿಟ್ಟು ಭಾರತೀಯ ರಾಯಭಾರ ಕಚೇರಿಯನ್ನು ಸಂಪರ್ಕಿಸಲು ನನಗೆ ಸಹಾಯ ಮಾಡಿ” ಎಂದು ಕಣ್ಣೀರಿಟ್ಟು ಸಹಾಯ ಕೋರಿದ್ದರು.
ಸೋಮವಾರ ಸಂಜೆ ಟ್ರಕ್ ಹತ್ತಿ ಬಾಮಿಯಾನ್ ತಲುಪಿದ ವೇಳೆ, ರಾತ್ರಿ ವೇಳೆಯಲ್ಲಿ ಒಂಟಿ ಮಹಿಳೆಯನ್ನು ಕಂಡು ಸ್ಥಳೀಯರು ಹಾಗೂ ತಾಲಿಬಾನ್ ಪಡೆಗಳು ಸುತ್ತುವರಿದಿದ್ದವು. “ಅಫ್ಘಾನ್ನಲ್ಲಿ ಪ್ರತಿಯೊಬ್ಬ ತಾಲಿಬಾನ್ ಸದಸ್ಯನೂ ಪೊಲೀಸ್ ಅಧಿಕಾರಿಯಂತೆ. ಪುರುಷ ಸಂಗಾತಿ (ಮಹ್ರಮ್) ಅಥವಾ ಗೈಡ್ ಇಲ್ಲದೆ ಪ್ರಯಾಣಿಸಲು ಅನುಮತಿ ನೀಡಲು ಜಲಾಲಾಬಾದ್ ಅಧಿಕಾರಿಗಳು ನಿರಾಕರಿಸಿದ್ದರು. ನಿಯಮ ಉಲ್ಲಂಘಿಸಿದ್ದಕ್ಕೆ ಬಂಧಿಸುವುದಾಗಿ ಹೇಳಿದ್ದರು. ಆ ಸಮಯ ಅತ್ಯಂತ ಭಯಾನಕವಾಗಿತ್ತು, ಜೀವ ಉಳಿಯುವುದಿಲ್ಲ ಎಂದುಕೊಂಡಿದ್ದೆ” ಎಂದು ಅರುಣಿಮಾ ವಿವರಿಸಿದ್ದಾರೆ.
ಆತಂಕದ ಗಂಟೆಗಳ ಬಳಿಕ ಭಾರತೀಯ ರಾಯಭಾರ ಕಚೇರಿ ಹಾಗೂ ಸ್ಥಳೀಯರ ನೆರವಿನಿಂದ ಪ್ರಕರಣ ತಿಳಿಯಾಗಿದೆ. ಮಂಗಳವಾರ ಬೆಳಿಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿರುವ ಅರುಣಿಮಾ, “ನಾನು ಈಗ ಸಂಪೂರ್ಣ ಸುರಕ್ಷಿತವಾಗಿದ್ದೇನೆ” ಎಂದು ಮಾಹಿತಿ ನೀಡಿದ್ದಾರೆ. ಪ್ರಸ್ತುತ ಅಫ್ಘಾನಿಸ್ತಾನದ ಸಾಹಸವನ್ನು ಮುಗಿಸಿ 500 ಕಿ.ಮೀ ದೂರದಲ್ಲಿರುವ ಉಜ್ಬೇಕಿಸ್ತಾನ್ ಗಡಿಯತ್ತ ತೆರಳುತ್ತಿದ್ದು, ಮಾರ್ಗಮಧ್ಯದ ಚೆಕ್ಪೋಸ್ಟ್ಗಳನ್ನು ದಾಟುವ ಬಗ್ಗೆ ಆತಂಕ ವ್ಯಕ್ತಪಡಿಸಿದ್ದಾರೆ.
