ಕುಂದಾಪುರ: ಬಳ್ಕೂರು ಗ್ರಾಮದ ವಿಷ್ಣುಮೂರ್ತಿ ದೇವಸ್ಥಾನದ ಸಮೀಪ ಅತಿವೇಗ ಮತ್ತು ಅಜಾಗರೂಕತೆಯಿಂದ ರಸ್ತೆಯ ಬಲಬಾಗಕ್ಕೆ ಚಲಾಯಿಸಿಕೊಂಡು ಬಂದ ಟಿಪ್ಪರ್‌ಗಳು ಸ್ಕೂಟರ್‌ಗೆ ಮುಖಾಮುಖಿ ಢಿಕ್ಕಿ ಹೊಡೆದ ಪರಿಣಾಮ, ಸ್ಕೂಟರ್ ಸವಾರರಿಬ್ಬರು ಗಂಭೀರ ಗಾಯಗೊಂಡು ಮಣಿಪಾಲ ಕೆಎಂಸಿ ಆಸ್ಪತ್ರೆಗೆ ದಾಖಲಾಗಿರುವ ಘಟನೆ ವರದಿಯಾಗಿದೆ.
ಅಪಘಾತ ಮಾತ್ರವಲ್ಲದೆ, ಯಾವುದೇ ಅಧಿಕೃತ ಪರವಾನಗಿ ಇಲ್ಲದೆ ಅಕ್ರಮವಾಗಿ ಕೊಜೆ ಮಣ್ಣು ಸಾಗಿಸುತ್ತಿದ್ದದ್ದು ಮತ್ತು ಅಪಘಾತದ ಬಳಿಕ ಸಾಕ್ಷಿ ನಾಶಪಡಿಸಲು ಯತ್ನಿಸಿರುವುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ. ಈ ಸಂಬಂಧ ಕುಂದಾಪುರ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಭಾರತೀಯ ನ್ಯಾಯ ಸಂಹಿತೆ (BNS 2023) ಹಾಗೂ ಎಂಎಂಆರ್‌ಡಿ (MMRD) ಕಾಯ್ದೆಯಡಿ ಕಠಿಣ ಪ್ರಕರಣ ದಾಖಲಾಗಿದೆ.
ದೂರುದಾರರಾದ ಕಾವ್ರಾಡಿಯ ಕೆ. ಜಾವೇದ್ (38) ಅವರು ಅಕ್ಟೋಬರ್ 30 ರ ಬೆಳಿಗ್ಗೆ 08:45 ರ ಸುಮಾರಿಗೆ ತಮ್ಮ ಮೋಟಾರು ಸೈಕಲ್‌ನಲ್ಲಿ ಬಸ್ರೂರಿಗೆ ಪೆಟ್ರೋಲ್ ಹಾಕಿಸಲು ತೆರಳುತ್ತಿದ್ದರು. ಆ ಸಮಯದಲ್ಲಿ ಬಳ್ಕೂರು ವಿಷ್ಣುಮೂರ್ತಿ ದೇವಸ್ಥಾನದಿಂದ 100 ಮೀಟರ್ ಹಿಂದೆ, ಎದುರಿನಲ್ಲಿ ಕುಂದಾಪುರದಿಂದ ಕಂಡ್ಲೂರು ಕಡೆಗೆ ಹೋಗುತ್ತಿದ್ದ ಬಸ್‌ವೊಂದು ನಿಧಾನವಾಗಿ ಸಾಗುತ್ತಿತ್ತು.
ಬಸ್ಸಿನ ಹಿಂದಿನಿಂದ ಬಿ.ಎಚ್. ಕಡೆಯಿಂದ ಕಂಡ್ಲೂರು ಕಡೆಗೆ ಎರಡು ಟಿಪ್ಪರ್‌ಗಳು ಒಂದರ ಹಿಂದೆ ಮತ್ತೊಂದು ಅತಿ ವೇಗವಾಗಿ ಬಂದಿವೆ. ಮೊದಲ ಟಿಪ್ಪರ್ ಚಾಲಕ ನಾಗರಾಜ್ ಶೆಟ್ಟಿ ತನ್ನ ವಾಹನವನ್ನು ನಿಧಾನಗೊಳಿಸಿದರೆ, ಹಿಂದಿನ ಟಿಪ್ಪರ್ ಚಾಲಕ ರತ್ವೀಜ್ ಎದುರಿನಲ್ಲಿ ಬಸ್ ಹಾಗೂ ಟಿಪ್ಪರ್ ಇರುವುದನ್ನು ನೋಡಿದರೂ ಸಹ, ಉದ್ದೇಶಪೂರ್ವಕವಾಗಿ ತನ್ನ ಟಿಪ್ಪರ್ ಅನ್ನು ರಸ್ತೆಯ ತೀರ ಬಲಕ್ಕೆ (Wrong Side) ಚಲಾಯಿಸಿಕೊಂಡು ಹೋಗಿ, ಎದುರಿನಿಂದ ಬಸ್ರೂರು ಕಡೆಗೆ ಬರುತ್ತಿದ್ದ ಸ್ಕೂಟರ್‌ಗೆ ಭೀಕರವಾಗಿ ಢಿಕ್ಕಿ ಹೊಡೆದಿದ್ದಾನೆ.
ಢಿಕ್ಕಿಯ ರಭಸಕ್ಕೆ ಸ್ಕೂಟರ್ ಸವಾರರಿಬ್ಬರೂ ಟಿಪ್ಪರ್ ಅಡಿಭಾಗದಲ್ಲಿ ಸಿಲುಕಿಹಾಕಿಕೊಂಡಿದ್ದು, ಸ್ಥಳೀಯರು ಹಾಗೂ ದೂರುದಾರರು ಅವರನ್ನು ಹೊರತೆಗೆದು ತಕ್ಷಣವೇ ಆಂಬ್ಯುಲೆನ್ಸ್ ಮೂಲಕ ಮಣಿಪಾಲ ಕೆಎಂಸಿ (KMC) ಆಸ್ಪತ್ರೆಗೆ ಚಿಕಿತ್ಸೆಗೆ ದಾಖಲಿಸಿದ್ದಾರೆ. ಸವಾರರಿಗೆ ತಲೆ, ಹೊಟ್ಟೆ, ಮೈ ಹಾಗೂ ಕೈ-ಕಾಲುಗಳಿಗೆ ತೀವ್ರ ಸ್ವರೂಪದ ಗಾಯಗಳಾಗಿವೆ. ಎರಡೂ ಟಿಪ್ಪರ್‌ಗಳಲ್ಲಿ ‘ಕೊಜೆ ಮಣ್ಣು’ (Soft Clay) ಲೋಡ್ ಮಾಡಲಾಗಿತ್ತು. ವಿಶೇಷವೆಂದರೆ, ಟಿಪ್ಪರ್ ಚಾಲಕ ರತ್ವೀಜ್ ಅಪಘಾತವಾದ ತಕ್ಷಣವೇ ಸ್ಥಳದಲ್ಲೇ ಗಾಯಾಳುಗಳಿಗೆ ಸಹಾಯ ಮಾಡುವ ಬದಲು, ಟಿಪ್ಪರ್ ಅನ್ನು ಕಂಡ್ಲೂರಿಗೆ ಓಡಿಸಿಕೊಂಡು ಹೋಗಿ ಅಲ್ಲಿ ಮಣ್ಣನ್ನು ಖಾಲಿ ಮಾಡಿ, ಬಳಿಕ ಖಾಲಿ ಟಿಪ್ಪರ್ ಅನ್ನು ವಾಪಸ್ ತಂದು ನಿಲ್ಲಿಸುವ ಮೂಲಕ ಸಾಕ್ಷಿ ನಾಶಪಡಿಸಲು (Destruction of Evidence) ಯತ್ನಿಸಿರುವುದು ತನಿಖೆಯಿಂದ ತಿಳಿದುಬಂದಿದೆ.
ಬೆಳಗ್ಗಿನ ಸಮಯದಲ್ಲಿ ಶಾಲಾ ಮಕ್ಕಳು ಹಾಗೂ ವಾಹನಗಳ ಭಾರಿ ದಟ್ಟಣೆ ಇರುತ್ತದೆ ಎಂಬ ಅರಿವಿದ್ದರೂ, ಪ್ರಾಣಾಪಾಯವಾಗಬಹುದು ಎಂದು ತಿಳಿದಿದ್ದರೂ ಯಾವುದೇ ರಕ್ಷಣೆ ಇಲ್ಲದೆ ಈ ಕೃತ್ಯ ಎಸಗಲಾಗಿದೆ.
ಸ್ಥಳೀಯರು ವಿಚಾರಿಸಿದಾಗ, ಪೇತ್ರಿ ಎಂಬಲ್ಲಿನ ಕ್ವಾರೆಯಿಂದ ಗಣಿ ಇಲಾಖೆಯಿಂದ ಯಾವುದೇ ಪರವಾನಗಿ ಪಡೆಯದೆ, ಸರ್ಕಾರಕ್ಕೆ ರಾಜಧನ (Royalty) ಪಾವತಿಸದೆ, ಕೊಜೆ ಮಣ್ಣನ್ನು ಅಕ್ರಮವಾಗಿ ಕಳವು ಮಾಡಿ ಸಾಗಿಸುತ್ತಿರುವುದು ಬಯಲಾಗಿದೆ. ಟಿಪ್ಪರ್ ವಾಹನಗಳ ಆರ್‌ಸಿ ಮಾಲೀಕರು ಹಾಗೂ ಮಣ್ಣಿನ ಮಾಲೀಕರು ಈ ಅಕ್ರಮ ದಂಧೆಯಲ್ಲಿ ಭಾಗಿಯಾಗಿದ್ದಾರೆ. ಕುಂದಾಪುರ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಅಪರಾಧ ಕ್ರಮಾಂಕ 61/2026 ರಡಿ ಈ ಕೆಳಗಿನ ಕಠಿಣ ಕಾನೂನು ಕಲಂಗಳಡಿ ಪ್ರಕರಣ ದಾಖಲಿಸಲಾಗಿದೆ:
