ತಿರುವನಂತಪುರಂ: ಅಪ್ರಾಪ್ತ ಬಾಲಕಿಯರು ಹಾಗೂ ಯುವ ಮಹಿಳಾ ಕ್ರಿಕೆಟಿಗರ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ ಆರೋಪ ಸಾಬೀತಾದ ಹಿನ್ನೆಲೆಯಲ್ಲಿ ಕೇರಳ ಕ್ರಿಕೆಟ್ ಅಸೋಸಿಯೇಷನ್ (ಕೆಸಿಎ) ಮಾಜಿ ಕೋಚ್ ಎಂ. ಮನು (40) ಅವರಿಗೆ ತಿರುವನಂತಪುರಂ ತ್ವರಿತಗತಿ ವಿಶೇಷ ನ್ಯಾಯಾಲಯ ಭಾರೀ ಶಿಕ್ಷೆ ವಿಧಿಸಿದೆ. ಆರು ಪೋಕ್ಸೊ ಪ್ರಕರಣಗಳ ಪೈಕಿ ನಾಲ್ಕು ಪ್ರಕರಣಗಳಲ್ಲಿ ಈಗಾಗಲೇ ತೀರ್ಪು ಪ್ರಕಟವಾಗಿದ್ದು, ಇತ್ತೀಚಿನ ತೀರ್ಪಿನಲ್ಲಿ 99 ವರ್ಷಗಳ ಕಠಿಣ ಜೈಲು ಶಿಕ್ಷೆ ವಿಧಿಸಲಾಗಿದೆ. ಇದರಿಂದ ಒಟ್ಟು ಶಿಕ್ಷೆಯ ಅವಧಿ 127 ವರ್ಷಗಳಿಗೆ ಏರಿಕೆಯಾಗಿದೆ. ಉಳಿದಿರುವ ಎರಡು ಪ್ರಕರಣಗಳ ತೀರ್ಪು ಇನ್ನಷ್ಟೇ ಪ್ರಕಟವಾಗಬೇಕಿರುವುದರಿಂದ ಶಿಕ್ಷೆಯ ಪ್ರಮಾಣ ಮತ್ತಷ್ಟು ಹೆಚ್ಚುವ ಸಾಧ್ಯತೆಯಿದೆ.
ನ್ಯಾಯಾಲಯದ ಮುಂದೆ ಮಂಡಿಸಲಾದ ಪ್ರಾಸಿಕ್ಯೂಷನ್ ವಿವರಗಳ ಪ್ರಕಾರ, ಮೂರನೇ ಪ್ರಕರಣದ ಸಂತ್ರಸ್ತೆ 2018ರಲ್ಲಿ ಐದನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದಾಗ ತಿರುವನಂತಪುರಂನ ಪ್ರಮುಖ ಕ್ರಿಕೆಟ್ ತರಬೇತಿ ಕೇಂದ್ರಕ್ಕೆ ಸೇರಿದ್ದಳು. ಆರಂಭದಲ್ಲಿ ತರಬೇತಿಯ ಹೆಸರಿನಲ್ಲಿ ಆಕೆಯ ವಿಶ್ವಾಸ ಗಳಿಸಿದ್ದ ಆರೋಪಿ, ನಂತರ ವಿಶೇಷ ಕೋಚಿಂಗ್ ನೀಡುವುದಾಗಿ ಹೇಳಿ ಜಿಮ್ನಾಷಿಯಂ, ಅಭ್ಯಾಸ ನೆಟ್ಸ್ ಹಾಗೂ ಸ್ನಾನಗೃಹದಂತಹ ಏಕಾಂತ ಸ್ಥಳಗಳಿಗೆ ಕರೆದೊಯ್ದು ಲೈಂಗಿಕ ದೌರ್ಜನ್ಯ ಎಸಗುತ್ತಿದ್ದ ಎಂದು ಆರೋಪಿಸಲಾಗಿದೆ.
ತನಿಖೆಯ ವೇಳೆ, ಬಾಲಕಿಯ ನಗ್ನ ಫೋಟೋ ಹಾಗೂ ವೀಡಿಯೊಗಳನ್ನು ಆರೋಪಿ ರಹಸ್ಯವಾಗಿ ದಾಖಲಿಸಿಕೊಂಡಿದ್ದಾನೆ ಎಂಬ ಅಂಶವೂ ಬೆಳಕಿಗೆ ಬಂದಿದೆ. ಈ ವಿಷಯವನ್ನು ಯಾರಿಗೂ ತಿಳಿಸಿದರೆ ಆಕೆಯ ಕ್ರಿಕೆಟ್ ಭವಿಷ್ಯವನ್ನು ಹಾಳು ಮಾಡುವುದಾಗಿ ಬೆದರಿಕೆ ಹಾಕಿದ್ದರಿಂದ, ಸಂತ್ರಸ್ತೆ ಹಲವು ವರ್ಷಗಳ ಕಾಲ ಮೌನ ವಹಿಸಿದ್ದಳು ಎಂದು ಪ್ರಾಸಿಕ್ಯೂಷನ್ ನ್ಯಾಯಾಲಯಕ್ಕೆ ತಿಳಿಸಿತು.
ಈ ಪ್ರಕರಣವು 2024ರ ಮಾರ್ಚ್ 28ರಂದು ತಿರುವನಂತಪುರಂನಲ್ಲಿ ನಡೆದ ಬಾಲಕಿಯರ ಕ್ರಿಕೆಟ್ ಟೂರ್ನಿಯ ವೇಳೆ ಬಹಿರಂಗಗೊಂಡಿತ್ತು. ಹಲವು ವರ್ಷಗಳ ಬಳಿಕ ಪಂದ್ಯಾವಳಿಯಲ್ಲಿ ಆರೋಪಿಯನ್ನು ಕಂಡ ಸಂತ್ರಸ್ತೆ ತೀವ್ರ ಆತಂಕಕ್ಕೆ ಒಳಗಾಗಿ ಪ್ಯಾನಿಕ್ ಅಟ್ಯಾಕ್ ಅನುಭವಿಸಿದ್ದಳು. ಆಕೆಯ ಅಸಹಜ ವರ್ತನೆಯನ್ನು ಗಮನಿಸಿದ ಸಹ ಆಟಗಾರ್ತಿಯರು ವಿಚಾರಿಸಿದಾಗ, ವರ್ಷಗಳಿಂದ ಮುಚ್ಚಿಟ್ಟಿದ್ದ ಲೈಂಗಿಕ ದೌರ್ಜನ್ಯದ ಘಟನೆಗಳು ಹೊರಬಿದ್ದವು.
ಈ ಬೆಳವಣಿಗೆಯ ನಂತರ ಮತ್ತಷ್ಟು ಯುವ ಮಹಿಳಾ ಕ್ರಿಕೆಟಿಗರು ಧೈರ್ಯದಿಂದ ಮುಂದೆ ಬಂದು ತಮ್ಮ ಮೇಲೂ ಇದೇ ರೀತಿಯ ದೌರ್ಜನ್ಯ ನಡೆದಿರುವುದಾಗಿ ದೂರು ದಾಖಲಿಸಿದರು. ಪ್ರಕರಣದ ಗಂಭೀರತೆಯನ್ನು ಪರಿಗಣಿಸಿದ ಕಂಟೋನ್ಮೆಂಟ್ ಪೊಲೀಸರು ಒಟ್ಟು ಆರು ಪೋಕ್ಸೊ ಪ್ರಕರಣಗಳನ್ನು ದಾಖಲಿಸಿ ತನಿಖೆ ಕೈಗೊಂಡಿದ್ದರು. ನ್ಯಾಯಾಲಯದಲ್ಲಿ ಸರ್ಕಾರದ ಪರವಾಗಿ ವಿಶೇಷ ಸಾರ್ವಜನಿಕ ಅಭಿಯೋಜಕ ಆರ್.ಎಸ್. ವಿಜಯ್ ಮೋಹನ್ ವಾದ ಮಂಡಿಸಿದ್ದರು.
