ವಾಷಿಂಗ್ಟನ್: ಅಮೆರಿಕ ಸರ್ಕಾರದ ಆಹಾರ ನೆರವು ಯೋಜನೆಯಲ್ಲಿ ಕೋಟ್ಯಂತರ ರೂಪಾಯಿ ವಂಚನೆ ಎಸಗಿದ ಆರೋಪ ಎದುರಿಸುತ್ತಿರುವ ಭಾರತೀಯ ಮೂಲದ ಮಂಜಿತ್ ಸಿಂಗ್ ಬೆಡಿ ಎಂಬಾತನನ್ನು ಅಮೆರಿಕದ ಫೆಡರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಷನ್ ತನ್ನ ‘ಮೋಸ್ಟ್ ವಾಂಟೆಡ್ ಫ್ರಾಡ್‌ಸ್ಟರ್ಸ್’ ಪಟ್ಟಿಗೆ ಸೇರಿಸಿದೆ.
$6,00,000 ಮೊತ್ತದ ‘ಕ್ಯಾಶ್-ಫಾರ್-ಬೆನಿಫಿಟ್ಸ್’ ವಂಚನೆ
65 ವರ್ಷದ ಮಂಜಿತ್ ಸಿಂಗ್ ಬೆಡಿ ವಾಷಿಂಗ್ಟನ್ ರಾಜ್ಯದ ಟಕೋಮಾದಲ್ಲಿ ‘ಏಷ್ಯನ್ ಗ್ರೋಸರಿ ಸ್ಟೋರ್’ ಎಂಬ ಸಣ್ಣ ಕಿರಾಣಿ ಅಂಗಡಿಯನ್ನು ನಡೆಸುತ್ತಿದ್ದನು.
ಅಮೆರಿಕ ಸರ್ಕಾರದ ಪೂರಕ ಪೋಷಕಾಂಶ ನೆರವು ಕಾರ್ಯಕ್ರಮದ (SNAP) ಅಡಿಯಲ್ಲಿ ಬಡ ಕುಟುಂಬಗಳಿಗೆ ನೀಡಲಾಗುವ ಇಬಿಟಿ (Electronic Benefit Transfer) ಕಾರ್ಡ್‌ಗಳನ್ನು ಬಳಸಿಕೊಂಡು ಈತ ಅಕ್ರಮ ಎಸಗಿದ್ದಾನೆ. ಅಂಗಡಿಗೆ ಬರುವ ಫಲಾನುಭವಿಗಳಿಗೆ ಆಹಾರ ಧಾನ್ಯಗಳನ್ನು ನೀಡುವ ಬದಲಿಗೆ, ಅವರ ಕಾರ್ಡ್ ಸ್ವೈಪ್ ಮಾಡಿ ನಗದು ನೀಡುತ್ತಿದ್ದ. ಈ ರೀತಿ ಪಡೆದ ಹಣದಲ್ಲಿ ಶೇಕಡಾ 50 ರಷ್ಟು ಕಮಿಷನ್ ಅನ್ನು ತಾನೇ ಇಟ್ಟುಕೊಳ್ಳುತ್ತಿದ್ದ ಎಂದು ಎಫ್‌ಬಿಐ ಆರೋಪಿಸಿದೆ. ಮಾರ್ಚ್ 2024 ರಿಂದ ಜೂನ್ 2025 ರ ನಡುವೆ ಈತ ಕನಿಷ್ಠ 6 ಲಕ್ಷ ಯುಎಸ್ ಡಾಲರ್ (ಅಂದಾಜು ₹5 ಕೋಟಿಗೂ ಹೆಚ್ಚು) ಮೌಲ್ಯದ ಸರ್ಕಾರಿ ಹಣವನ್ನು ವಂಚಿಸಿದ್ದಾನೆ.
ಭಾರತಕ್ಕೆ ಪರಾರಿಯಾದ ಆರೋಪಿ
ವಂಚನೆ (Wire Fraud) ಹಾಗೂ ಸ್ನಾಪ್ ಯೋಜನೆ ವಂಚನೆ ಆರೋಪದಡಿ ನ್ಯಾಯಾಲಯದಲ್ಲಿ ದೋಷಾರೋಪಣೆ ಎದುರಿಸಿದ್ದ ಬೆಡಿಗೆ ಜೈಲಿಗೆ ಕಳುಹಿಸದೆ, ಜಾಮೀನಿನ ಮೇಲೆ ಹೊರಬರಲು ಅವಕಾಶ ನೀಡಲಾಗಿತ್ತು. ಆದರೆ ಆತನಿಗೆ ಪಾಸ್‌ಪೋರ್ಟ್ ಒಪ್ಪಿಸಲು ಮತ್ತು ವಾಷಿಂಗ್ಟನ್ ರಾಜ್ಯದಲ್ಲೇ ಇರಲು ನ್ಯಾಯಾಲಯ ಆದೇಶಿಸಿತ್ತು. ಆದರೆ ಈ ಆದೇಶವನ್ನು ಉಲ್ಲಂಘಿಸಿದ ಬೆಡಿ, ಕಾರಿನಲ್ಲಿ ಕೆನಡಾಗೆ ಪ್ರಯಾಣಿಸಿ, ಅಲ್ಲಿಂದ ಭಾರತಕ್ಕೆ ಪರಾರಿಯಾಗಿದ್ದಾನೆ ಎಂದು ಎಫ್‌ಬಿಐ ತಿಳಿಸಿದೆ. ಜಾಮೀನು ಷರತ್ತುಗಳನ್ನು ಉಲ್ಲಂಘಿಸಿದ ಕಾರಣ ಮೇ 21 ರಂದು ಆತನ ವಿರುದ್ಧ ಫೆಡರಲ್ ಬಂಧನ ವಾರಂಟ್ ಹೊರಡಿಸಲಾಗಿದೆ.
ಮಾಹಿತಿ ನೀಡಿದವರಿಗೆ 1.25 ಕೋಟಿ ಬಹುಮಾನ
ಅಮೆರಿಕದ ಪೌರತ್ವ ಹೊಂದಿರುವ ಮಂಜಿತ್ ಸಿಂಗ್ ಬೆಡಿಯ ಬಂಧನಕ್ಕೆ ನಿಖರ ಮಾಹಿತಿ ನೀಡಿದವರಿಗೆ 1.5 ಲಕ್ಷ ಯುಎಸ್ ಡಾಲರ್ (ಸುಮಾರು ₹1.25 ಕೋಟಿ) ಬಹುಮಾನ ನೀಡುವುದಾಗಿ ಎಫ್‌ಬಿಐ ಘೋಷಿಸಿದೆ. ಎಫ್‌ಬಿಐ ಅಧಿಕಾರಿಗಳು ಪ್ರಸ್ತುತ ಬೆಡಿಯ ಕುಟುಂಬ ಸದಸ್ಯರ ಸಂಪರ್ಕದಲ್ಲಿದ್ದು, ಆತನನ್ನು ಮರಳಿ ಬಂದು ಕಾನೂನು ಪ್ರಕ್ರಿಯೆಯನ್ನು ಎದುರಿಸುವಂತೆ ಮನವೊಲಿಸಲು ತಿಳಿಸಿದ್ದಾರೆ. ಜೊತೆಗೆ, ತಲೆಮರೆಸಿಕೊಂಡಿರುವ ಆರೋಪಿಗೆ ನೆರವು ನೀಡುವ ಯಾವುದೇ ವ್ಯಕ್ತಿ ಕಾನೂನಾತ್ಮಕ ಕ್ರಮ ಎದುರಿಸಬೇಕಾಗುತ್ತದೆ ಎಂದು ಎಫ್‌ಬಿಐ ಅಧಿಕಾರಿಗಳು ಎಚ್ಚರಿಸಿದ್ದಾರೆ.
