ಮಂಗಳೂರು: ಮಂಗಳೂರಿನ ಎಂಆರ್‌ಪಿಎಲ್‌ನ ಮೂರನೇ ಹಂತದ ವಿಸ್ತರಣಾ ಘಟಕದಲ್ಲಿ ಸೆಪ್ಟೆಂಬರ್ 30ರಂದು ಸಂಭವಿಸಿದ ಅವಘಡದಿಂದ ₹118.76 ಕೋಟಿ ನಷ್ಟ ಉಂಟಾಗಿದೆ ಎಂದು ಕಂಪನಿಯ ತ್ರೈಮಾಸಿಕ ವರದಿಯಲ್ಲಿ ತಿಳಿಸಲಾಗಿದೆ.
ನಿರ್ದೇಶಕ ಮಂಡಳಿಯ ಸಭೆಯ ಬಳಿಕ ಕಂಪನಿಯು ಈ ಸಂಬಂಧ ಸ್ಟಾಕ್ ಎಕ್ಸ್‌ಚೇಂಜ್‌ಗಳಿಗೆ ವರದಿ ಸಲ್ಲಿಸಿದೆ. ರಿಫೈನರಿ ಸಂಕೀರ್ಣದ ಮೂರನೇ ಹಂತದಲ್ಲಿರುವ ಕಾಕರ್ ಹೈಡ್ರೋಟ್ರೀಟರ್ ಘಟಕದಲ್ಲಿ (CHTU) ಈ ಘಟನೆ ನಡೆದಿತ್ತು. ಹಾನಿಗೊಳಗಾದ ಉತ್ಪಾದನಾ ಘಟಕಗಳು ಹಾಗೂ ಯಂತ್ರೋಪಕರಣಗಳ ಮೌಲ್ಯಮಾಪನದ ಆಧಾರದಲ್ಲಿ ನಷ್ಟವನ್ನು ಅಂದಾಜಿಸಲಾಗಿದೆ. ಹಾನಿಗೊಳಗಾದ ಆಸ್ತಿಗಳನ್ನು ಮರುಸ್ಥಾಪಿಸಲು ಸುಮಾರು ₹225 ಕೋಟಿ ವೆಚ್ಚವಾಗುವ ಸಾಧ್ಯತೆಯಿದೆ ಎಂದು ಕಂಪನಿ ತಿಳಿಸಿದೆ. ಹಾನಿಗೊಳಗಾದ ಆಸ್ತಿಗಳಿಗೆ ವಿಮಾ ರಕ್ಷಣೆ ಇದೆ ಎಂದೂ ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಸ್ಫೋಟದ ಬದಲು ಬೆಂಕಿ ಅವಘಡ ಎಂದು ವರದಿ
ಘಟಕದಲ್ಲಿ ಸ್ಫೋಟ ಸಂಭವಿಸಿದೆ ಎಂಬ ಮಾಹಿತಿ ಹರಿದಾಡಿದ್ದರೂ, ಕಂಪನಿಯ ವರದಿಯಲ್ಲಿ ಇದನ್ನು ಬೆಂಕಿ ಅವಘಡ ಎಂದು ದಾಖಲಿಸಲಾಗಿದೆ.
ಇದೇ ವೇಳೆ, 2026-27ರ ಹಣಕಾಸು ವರ್ಷದ ಎರಡನೇ ತ್ರೈಮಾಸಿಕದಲ್ಲಿ ಎಂಆರ್ಪಿಎಲ್ ₹1,881 ಕೋಟಿ ಆದಾಯ ದಾಖಲಿಸಿದೆ. ಕಳೆದ ವರ್ಷದ ಇದೇ ಅವಧಿಯಲ್ಲಿ ಕಂಪನಿಯ ಆದಾಯ ₹639 ಕೋಟಿ ಇತ್ತು. ಇದರಿಂದ ವಾರ್ಷಿಕ ಹೋಲಿಕೆಯಲ್ಲಿ ಆದಾಯದಲ್ಲಿ ಶೇ.194ರಷ್ಟು ಏರಿಕೆಯಾಗಿದೆ.
ಅರ್ಧವಾರ್ಷಿಕ ಆದಾಯದಲ್ಲೂ ಏರಿಕೆ
ಹಣಕಾಸು ವರ್ಷದ ಮೊದಲ ಆರು ತಿಂಗಳಲ್ಲಿ ಎಂಆರ್ಪಿಎಲ್ ಒಟ್ಟು ₹35,590 ಕೋಟಿ ಆದಾಯ ಗಳಿಸಿದೆ. ಇದರಲ್ಲಿ ರಫ್ತು ವಹಿವಾಟಿನಿಂದ ಬಂದ ಆದಾಯವೂ ಸೇರಿದೆ. ಕಳೆದ ವರ್ಷದ ಇದೇ ಅವಧಿಯಲ್ಲಿ ಕಂಪನಿಯ ಒಟ್ಟು ಆದಾಯ ₹25,953 ಕೋಟಿ ಆಗಿತ್ತು.
ಉತ್ಪಾದನೆಯ ವಿಷಯದಲ್ಲಿ, ಪ್ರಸಕ್ತ ಅರ್ಧವಾರ್ಷಿಕ ಅವಧಿಯಲ್ಲಿ ಕಂಪನಿಯು 4.18 ಮಿಲಿಯನ್ ಟನ್ ಉತ್ಪಾದನೆ ದಾಖಲಿಸಿದೆ. ಕಳೆದ ವರ್ಷದ ಇದೇ ಅವಧಿಯಲ್ಲಿ ಉತ್ಪಾದನೆಯ ಪ್ರಮಾಣ 4.43 ಮಿಲಿಯನ್ ಟನ್ ಆಗಿತ್ತು
