ತಿರುವನಂತಪುರಂ: ಭಾರತದ ರಕ್ಷಣಾ ಸಾಮರ್ಥ್ಯವನ್ನು ಮತ್ತಷ್ಟು ಬಲಪಡಿಸುವ ಮಹತ್ವದ ಹೆಜ್ಜೆಯಾಗಿ, ಹೊಸ ಪೀಳಿಗೆಯ ಬ್ರಹ್ಮೋಸ್-ಎನ್ಜಿ ಸೂಪರ್ಸಾನಿಕ್ ಕ್ರೂಸ್ ಕ್ಷಿಪಣಿಗಳ ಉತ್ಪಾದನಾ ಘಟಕವನ್ನು ಕೇರಳದ ತಿರುವನಂತಪುರಂ ಸಮೀಪದ ನೆಟ್ಟುಕಲ್ತೇರಿಯಲ್ಲಿ ಸ್ಥಾಪಿಸಲು ಸಿದ್ಧತೆಗಳು ಆರಂಭವಾಗಿವೆ. ಈ ಉದ್ದೇಶಕ್ಕಾಗಿ ಸುಮಾರು 180 ಎಕರೆ ಭೂಮಿಯನ್ನು ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆಗೆ ಹಸ್ತಾಂತರಿಸಲು ರಾಜ್ಯ ಸರ್ಕಾರ ಮುಂದಾಗಿದೆ ಎಂದು ವರದಿಯಾಗಿದೆ.
ಪ್ರಸ್ತುತ ತಿರುವನಂತಪುರಂನ ಚಕ್ಕಾದಲ್ಲಿರುವ ಬ್ರಹ್ಮೋಸ್ ಏರೋಸ್ಪೇಸ್ ತಿರುವನಂತಪುರಂ ಲಿಮಿಟೆಡ್ ಘಟಕದಲ್ಲಿ ಕ್ಷಿಪಣಿಗಳ ಹೊರ ಶೆಲ್, ಕಂಟೇನರ್ ಮತ್ತು ಏರ್ಬೋರ್ನ್ ಲಾಂಚರ್ಗಳ ನಿರ್ಮಾಣ ನಡೆಯುತ್ತಿದೆ. ಹೊಸ ಘಟಕದಲ್ಲಿ ಸಂಪೂರ್ಣ ಪ್ರಮಾಣದಲ್ಲಿ ಹೊಸ ತಲೆಮಾರಿನ ಬ್ರಹ್ಮೋಸ್-ಎನ್ಜಿ ಕ್ಷಿಪಣಿಗಳ ಉತ್ಪಾದನೆಗೆ ಅಗತ್ಯವಾದ ಮೂಲಸೌಕರ್ಯವನ್ನು ಅಭಿವೃದ್ಧಿಪಡಿಸಲಾಗುತ್ತದೆ.
ಬ್ರಹ್ಮೋಸ್-ಎನ್ಜಿ ಎಂದರೇನು? : ಬ್ರಹ್ಮೋಸ್-ಎನ್ಜಿ ಈಗ ಬಳಕೆಯಲ್ಲಿರುವ ಬ್ರಹ್ಮೋಸ್ ಕ್ಷಿಪಣಿಯ ಹಗುರ ಮತ್ತು ಚಿಕ್ಕ ಆವೃತ್ತಿಯಾಗಿದೆ. ಸುಮಾರು 3 ಟನ್ ತೂಕದ ಸಾಂಪ್ರದಾಯಿಕ ಬ್ರಹ್ಮೋಸ್ಗೆ ಹೋಲಿಸಿದರೆ, ಹೊಸ ಮಾದರಿಯ ತೂಕ 1.3 ರಿಂದ 1.5 ಟನ್ ಮಾತ್ರವಾಗಿದ್ದು, ಉದ್ದವೂ 5–6 ಮೀಟರ್ಗಳಷ್ಟಿರಲಿದೆ.
ಇದರ ಪರಿಣಾಮವಾಗಿ ತೇಜಸ್, MiG-29, ರಫೇಲ್ ಸೇರಿದಂತೆ ಹಲವು ಯುದ್ಧ ವಿಮಾನಗಳಲ್ಲಿ ಈ ಕ್ಷಿಪಣಿಯನ್ನು ಸುಲಭವಾಗಿ ಅಳವಡಿಸಬಹುದಾಗಿದೆ. ಸುಖೋಯ್-30ಎಂಕೆಐ ಯುದ್ಧವಿಮಾನವು ಒಂದೇ ವೇಳೆ ಮೂರು ಬ್ರಹ್ಮೋಸ್-ಎನ್ಜಿ ಕ್ಷಿಪಣಿಗಳನ್ನು ಹೊತ್ತೊಯ್ಯುವ ಸಾಮರ್ಥ್ಯ ಹೊಂದಲಿದೆ.
ವೇಗ, ಸಾಮರ್ಥ್ಯ ಮತ್ತು ರಹಸ್ಯ ತಂತ್ರಜ್ಞಾನ : ಹೊಸ ಬ್ರಹ್ಮೋಸ್-ಎನ್ಜಿ ಕ್ಷಿಪಣಿಯು ಧ್ವನಿಯ ವೇಗಕ್ಕಿಂತ ಸುಮಾರು ಮೂರು ಪಟ್ಟು ಹೆಚ್ಚು ವೇಗದಲ್ಲಿ ಚಲಿಸುವ ಸಾಮರ್ಥ್ಯವನ್ನು ಕಾಯ್ದುಕೊಳ್ಳಲಿದ್ದು, 290 ರಿಂದ 350 ಕಿಲೋಮೀಟರ್ ವ್ಯಾಪ್ತಿಯ ಗುರಿಗಳನ್ನು ಹೊಡೆಯಬಲ್ಲದು.
ಹೆಚ್ಚುವರಿಯಾಗಿ, ರಾಡಾರ್ಗಳಿಗೆ ಸುಲಭವಾಗಿ ಪತ್ತೆಯಾಗದ ಅತ್ಯಾಧುನಿಕ ತಂತ್ರಜ್ಞಾನವನ್ನು ಬಳಸಲಾಗುತ್ತಿರುವುದರಿಂದ, ಶತ್ರು ರಾಷ್ಟ್ರಗಳ ವಾಯು ರಕ್ಷಣಾ ವ್ಯವಸ್ಥೆಗಳಿಗೆ ಇದು ಇನ್ನಷ್ಟು ಸವಾಲಾಗಲಿದೆ ಎಂದು ರಕ್ಷಣಾ ವಲಯದ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಉತ್ತರ ಪ್ರದೇಶದ ಲಕ್ನೋದಲ್ಲಿ 2025ರಲ್ಲಿ ಆರಂಭವಾದ ಬ್ರಹ್ಮೋಸ್ ಉತ್ಪಾದನಾ ಘಟಕದ ಮಾದರಿಯಲ್ಲೇ ನೆಟ್ಟುಕಲ್ತೇರಿಯ ಘಟಕವನ್ನು ನಿರ್ಮಿಸಲಾಗುತ್ತದೆ. ಲಕ್ನೋ ಘಟಕವು ವರ್ಷಕ್ಕೆ 80ರಿಂದ 100 ಕ್ಷಿಪಣಿಗಳ ಉತ್ಪಾದನಾ ಸಾಮರ್ಥ್ಯ ಹೊಂದಿದ್ದು, ಕೇರಳದ ಹೊಸ ಘಟಕದ ಸಾಮರ್ಥ್ಯ ನಿರ್ಮಾಣ ಪೂರ್ಣಗೊಂಡ ಬಳಿಕ ಸ್ಪಷ್ಟವಾಗಲಿದೆ.
ಭಾರತ ಈಗಾಗಲೇ ಫಿಲಿಪೈನ್ಸ್ ಸೇರಿದಂತೆ ಸ್ನೇಹಪರ ರಾಷ್ಟ್ರಗಳಿಗೆ ಬ್ರಹ್ಮೋಸ್ ಕ್ಷಿಪಣಿಗಳನ್ನು ರಫ್ತು ಮಾಡುತ್ತಿದೆ. ಹೊಸ ಘಟಕ ಕಾರ್ಯಾರಂಭಿಸಿದ ಬಳಿಕ ರಫ್ತು ಪ್ರಮಾಣ ಹೆಚ್ಚಿಸುವ ಜೊತೆಗೆ, ಭಾರತದ ರಕ್ಷಣಾ ಉತ್ಪಾದನಾ ಸಾಮರ್ಥ್ಯಕ್ಕೂ ಹೊಸ ಬಲ ಸಿಗಲಿದೆ. ಇದರೊಂದಿಗೆ ಕೇರಳವು ದೇಶದ ಪ್ರಮುಖ ರಕ್ಷಣಾ ಉತ್ಪಾದನಾ ಕೇಂದ್ರಗಳಲ್ಲಿ ಒಂದಾಗಿ ಹೊರಹೊಮ್ಮುವ ಸಾಧ್ಯತೆ ಇದೆ. ಹೊಸ ಘಟಕದಿಂದ ಸ್ಥಳೀಯವಾಗಿ ಉದ್ಯೋಗಾವಕಾಶಗಳು ಹೆಚ್ಚುವ ನಿರೀಕ್ಷೆಯೂ ವ್ಯಕ್ತವಾಗಿದೆ.
