ಉಡುಪಿ : ಫೇಸ್‌ಬುಕ್‌ನಲ್ಲಿ ‘ಎಚ್‌ಡಿಎಫ್‌ಸಿ ಸೆಕ್ಯುರಿಟೀಸ್’ ಹೆಸರಿನ ನಕಲಿ ಲಿಂಕ್ ನೀಡಿ, ಶೇರು ಮಾರುಕಟ್ಟೆ ಟ್ರೇಡಿಂಗ್ ಹಾಗೂ ಐಪಿಒ ಹಂಚಿಕೆ ಹೆಸರಿನಲ್ಲಿ 75 ವರ್ಷದ ವೃದ್ಧರೊಬ್ಬರಿಗೆ ಬರೋಬ್ಬರಿ ₹14,35,724 ಲಕ್ಷ ವಂಚಿಸಿರುವ ಭಾರಿ ಸೈಬರ್ ಅಪರಾಧ ಪ್ರಕರಣ ಉಡುಪಿಯಲ್ಲಿ ಬೆಳಕಿಗೆ ಬಂದಿದೆ. ಉಡುಪಿಯ ರಮೇಶ ಶೆಟ್ಟಿ (75) ಎಂಬವರೇ ಸೈಬರ್ ಶಾರ್ಕ್‌ಗಳ ಬಲೆಗೆ ಬಿದ್ದು ಲಕ್ಷಾಂತರ ರೂಪಾಯಿ ಹಣ ಕಳೆದುಕೊಂಡ ದುರ್ದೈವಿ
ಕಳೆದ ಜುಲೈ 29, 2026 ರಂದು ರಮೇಶ ಶೆಟ್ಟಿ ಅವರ ಫೇಸ್‌ಬುಕ್‌ ಖಾತೆಗೆ HDFC Security ಹೆಸರಿನಲ್ಲಿ ಬಂದ ಲಿಂಕ್ ಮೂಲಕ ವಂಚಕರು ಸಂಪರ್ಕಿಸಿ ‘High Network Investor User ID’ ನೀಡಿದ್ದರು. ಇದನ್ನು ನಂಬಿ ಶೆಟ್ಟಿ ಅವರು ಆರಂಭದಲ್ಲಿ ₹40,000 ಹೂಡಿಕೆ ಮಾಡಿದ್ದರು. ವಂಚಕರು ಇದಕ್ಕೆ ಶೇ. 5 ರಷ್ಟು ಲಾಭಾಂಶ ತೋರಿಸಿ ಅವರ ನಂಬಿಕೆ ಗಿಟ್ಟಿಸಿಕೊಂಡಿದ್ದರು. ಬಳಿಕ ಆಗಸ್ಟ್ 18, 2026 ರಂದು ₹80,000, ₹50,000 ಹಾಗೂ ₹1,25,000 ಸೇರಿದಂತೆ ಹಂತ ಹಂತವಾಗಿ ವಿವಿಧ ಖಾತೆಗಳಿಗೆ ವಂಚಕರು ಸೂಚಿಸಿದಂತೆ ಭಾರಿ ಮೊತ್ತದ ಹಣವನ್ನು ವರ್ಗಾಯಿಸಿದ್ದರು.
ಸೆಪ್ಟೆಂಬರ್ 1, 2026 ರಂದು ವಂಚಕರು ಸಂದೇಶ ಕಳುಹಿಸಿ, “ನಿಮಗೆ ESDS Software Solution Ltd IPO ನ 3,400 ಶೇರ್‌ಗಳು ಲಭಿಸಿದ್ದು, ಅದಕ್ಕಾಗಿ ₹9,24,800 ಪಾವತಿಸಬೇಕು” ಎಂದು ತಿಳಿಸಿದ್ದಾರೆ. ಈ ವೇಳೆ ರಮೇಶ ಶೆಟ್ಟಿ ಅವರು “ನಾನು ಯಾವುದೇ ಐಪಿಒಗೆ ಅರ್ಜಿ ಸಲ್ಲಿಸಿಲ್ಲ, ನನ್ನ ಬಳಿ ಅಷ್ಟೊಂದು ಹಣವಿಲ್ಲ, ಇದನ್ನು ಕ್ಯಾನ್ಸಲ್ ಮಾಡಿ” ಎಂದು ಕೇಳಿಕೊಂಡಿದ್ದಾರೆ. ಆದರೆ ವಂಚಕರು ಐಪಿಒ ರದ್ದು ಮಾಡಲು ಒಪ್ಪದೆ, ಬಲವಂತವಾಗಿ ಸಾಲ ಮಾಡಿಸಿ ₹9.24 ಲಕ್ಷ ಹಣ ಕಟ್ಟಿಸಿಕೊಂಡಿದ್ದಾರೆ.
ಸಾಲ ಮಾಡಿ ಹಣ ಕಟ್ಟಿದ ಬಳಿಕ, ತಮ್ಮ ಖಾತೆಯಲ್ಲಿದ್ದ ಹಣವನ್ನು ಹಿಂಪಡೆಯಲು ರಮೇಶ ಶೆಟ್ಟಿ ಯತ್ನಿಸಿದಾಗ ವಂಚಕರು ಅದಕ್ಕೆ ಅವಕಾಶ ನೀಡಲಿಲ್ಲ. “ಒಟ್ಟು ಲಾಭಾಂಶದ ಶೇ. 10 ಅಂದರೆ ₹5,10,724 ಕಮಿಷನ್ ಮೊತ್ತ ಪಾವತಿಸಿದರೆ ಮಾತ್ರ ಹಣ ಪಡೆಯಲು ಬಿಡುತ್ತೇವೆ” ಎಂದು ಹೆದರಿಸಿದ್ದಾರೆ. ಇದನ್ನು ನಂಬಿ ಅವರು ಮತ್ತೆ ₹5.10 ಲಕ್ಷ ಹಣವನ್ನು ವಂಚಕರ ಖಾತೆಗೆ ಜಮಾ ಮಾಡಿದ್ದಾರೆ.
ಹಣ ಪಾವತಿಯಾಗುತ್ತಿದ್ದಂತೆ ಸೈಬರ್ ಖದೀಮರು ತಮ್ಮ ವಾಟ್ಸಾಪ್, ಕರೆ ಹಾಗೂ ಸಂದೇಶಗಳನ್ನು ಬಂದ್ ಮಾಡಿ ಸಂಪರ್ಕ ಕಡಿತಗೊಳಿಸಿದ್ದಾರೆ. ತಾವು ಪೂರ್ಣವಾಗಿ ವಂಚನೆಗೊಳಗಾಗಿರುವುದನ್ನು ಅರಿತ ರಮೇಶ ಶೆಟ್ಟಿ ಅವರು ಉಡುಪಿ ನಗರ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.
ದೂರಿನನ್ವಯ ಉಡುಪಿ ನಗರ ಪೊಲೀಸ್ ಠಾಣೆಯಲ್ಲಿ ಅಪರಾಧ ಕ್ರಮಾಂಕ 137/2026, ಐಟಿ ಕಾಯ್ದೆ ಕಲಂ 66 ಹಾಗೂ ಬಿಎನ್‌ಎಸ್ (BNS) ಕಲಂ 318(4) ರ ಅಡಿಯಲ್ಲಿ ಪ್ರಕರಣ ದಾಖಲಾಗಿದ್ದು, ಸೈಬರ್ ಸೆಲ್ ಪೊಲೀಸರು ತನಿಖೆ ಚುರುಕುಗೊಳಿಸಿದ್ದಾರೆ.
